Pasineqarnerit procentinngorlugit
Politiit inunnut ataasiakkaanut arlalinnulluunniit pasinnittarnerat unioqqutitsinerup suunera aallaavigalugu assigiinneq ajorput.
Pasineqarnerit procentinngornerini pinerluttuliornermut inatsit, angallannermut inatsit aammalu immikkut inatsisit allat ataatsimut isigalugit unnerluussinerit pasineqarnernik kinguneqartartut angallannermut inatsimmi qaffasinnerpaapput. Tamannalu taaneqareersutut angallannermut inatsimmik unioqqutitsinermi politiit namminneerlutik unioqqutitsinernik nalunaarsuisarnerannik, assersuutigalugu biilertumik unitsitsinermi piffimmi pasineqarnermik kinguneqarsinnaasumik, peqquteqarpoq.
Titartagaq 3. 2014-imiit 2018-imut pinerluttuliornermi inatsimmi, angallannermut inatsimmi aammalu immikkut inatsisini allani pasineqarnerit procentinngorlugit
Najoqqutaq: Naatsorsueqqissaartarfik – kisitsisaataasivimmi kisitsisit takukkit: http://bank.stat.gl/KRNAN
Titartagaq 3-mi takutinneqarpoq 2018-imi angallannermut inatsimmi unioqqutitsinermi unnerluussinerit 90 pct.-ii pasineqarnernik kinguneqarsimasut qaffasinnersaasut. Immikkullu inatsisinik allanik unioqqutitsinermi unnerluussinerit 80 pct.-ii pasineqarnermik kinguneqartut pinerluttuliornermi inatsimmik unioqqutitsinermi unnerluussinerit 58 pct.-ii pasineqarnernik kinguneqarsimapput.
Pinerluttuliornermi inatsimmik unioqqutitsineq unioqqutitsinerup suunera apeqqutaalluni pasineqarnermik kinguneqartarpoq. Inummik navianartorsiortitsilluni pinerluuteqarnermi unnerluussinerit soorlu nakuusernerit, toqutsinerit, pinngitsaaliilluni atoqateqarnerit, ujajaanerit imaluunniit tillinnerit assigiinngitsut pasineqarnermik kinguneqarajunnerusarput. Pasineqarnerillu procentinngorneranni toqutsilluni timimillu pinerliilluni pinerluttuliornermi unnerluussinerit 74 pct.-ii pasineqarnernik kinguneqartut qaffasinnersaapput, kinguaassiuutitigut pinerluttuliornermi unnerluussinerit 59 pct.-ii pasineqarnernik kinguneqartarsimallutik, pisuussutillu tungaasigut pinerluttuliornermi unnerluussinerit 48 pct.-ii pasineqarnernik kinguneqarsimasut annikinnersaapput.
Titartagaq 4. 2014-imiit 2018-imut pinerluttuliornermi inatsimmik unioqqutitsinermi pasineqarnerit procentinngorneri
Najoqqutaq: Naatsorsueqqissaartarfik – kisitsisaataasivimmi kisitsisit takukkit: http://bank.stat.gl/KRNAN
Ukiuni kingullerni unnerluussinerit pasineqarnermik kinguneqartartut procentinngorneri appariarsimasut takuneqarsinnaavoq.